மாடி வீடு, ஏசி காரு
வயல் வெளி, சிறிது காணி
வங்கியில் ரொக்கம்
வாழத் தேவையான
அனைத்தையும் சேர்த்துவிட்டு
வாழத் தொடங்கலாம் - என்று
எண்ணும் போதுதான் உணர்ந்தேன்
இதற்கு மேல் - வாழ்வதற்கு
எதுவுமில்லை என்பதை
இளமையை விற்றுத்தான்
செல்வத்தைச் சேர்த்திருக்கிறேன்
அடுத்தவர் கனவுகளை நினைவாக்க
என் கனவுகளை கலைத்திருக்கிறேன்
அடுத்தவர் ஆசைகளை நிறைவேற்ற
என் ஆசைகளை இழந்திருக்கிறேன்
இது தவறான வியாபாரம்
எப்போதுமே லாபமீட்டாது
விழித்துக்கொண்ட பின்புதான்
இது கனவென்று உணர்ந்தேன்
வாழ்வை உணர்ந்த தருணத்திலே
வாழ்வின் முடிவுக்கு வந்துவிட்டேன்
எதிர்காலம் எனும் கனவினிலே
நிகழ்காலம் முழுவதும்
தொலைத்துவிட்டேன்
வாழ்க்கையின் இடையில்
பணம் தேடவேண்டும்
என்பதை உணராமல்
வாழ மறந்து
பணம் சேர்த்தேன்
சேர்த்த செல்வங்களில்
பகுதி ஊருக்கு, பகுதி பேருக்கு
பகுதி மருத்துவமனைக்கு
மீதம் இருந்தால்
என் பிள்ளைகளுக்கு
உடலைப் பிரிந்த உயிர்
வில்லிலிருந்து சீரிய அம்பு
கூறிவிட்ட வார்த்தை
மட்டுமல்ல
இழந்துவிட்ட இளமையும்
நிச்சயமாகத் திரும்பாது
வாழ்க்கையை வாழுங்கள்
வாழ்க்கை அழகானது
இளமையை விற்று
செல்வத்தைச் சேர்க்கலாம் - ஆனால்
எவ்வளவு செல்வத்தைக் கொடுத்தாலும்
இளமையை வாங்க முடியாது
